Kampeni ya shule ni choo yaanza kwa mafanikio

Posted on: October 13th, 2019

Kampeni ya SHULE NI CHOO MSITIRI MWANAFUNZI NA MWALIMU iliyoanzishwa na mkuu wa Mkoa wa Mtwara Mhe. Gelasius Byakanwa imekusanya zaidi ya shilingi milioni 265 pamoja na vifaa mbalimbali vya ujenzi. Kampeini hiyo ilitangazwa mapema Agosti mwaka huu na Mkuu wa Mkoa huo na kuzinduliwa leo na Waziri wa Elimu Profesa Joyce Ndalichako.

Akitambulisha kampeni hiyo Byakanwa amesema Mkoa una upungufu wa matundu ya choo 6,674 ambayo gharama za ujenzi  zinafikia bilioni 6,674,000,000.

Amesema Gharama hizo hazimtishi kwani wananchi anaowaongoza wamekuwa na mwitikio mzuri ambao utawezeza kusaidia kupunguza gharama hizo kwa njia moja ama nyingine. 

Kwa upande wake Mgeni rasmi wa uzinduzi huo Mhe. Profesa Joyce Ndalichako amepongeza hatua hiyo na kusema itasaidia kuongeza hamasa ya kusoma na kupunguza maradhi kwa wanafunzi na walimu. Amesema Wizara yake itachangia shilingi milioni mia moja na kumi.

Wachangiaji wengine waliojitokeza katika kampeni hiyo itakayodumu kwa kipindi cha mwaka mmoja ni pamoja na Wizara ya Afya, wafanyabiashara, vyama vya wafanyakazi na makampuni binafsi.