MATEMBEZI MTAA KWA MTAA; TUJIANDIKISHE TUSHIRIKI UCHAGUZI WA SERIKALI ZA MITAA

Posted on: October 14th, 2024

Mamia ya wananchi wa Mkoa wa Mtwara wakiongozwa na Mkuu wa Mkoa, Mhe. Kanali Patrick Sawala leo tarehe 14 Oktoba 2024 wamejitokeza katika matembezi yaliyojumuisha bodaboda, bajaji na watembea kwa miguu kwa lengo la kuhamasisha Uandikishaji wa wapiga kura kwaajili ya Uchaguzi wa Serikali za Mitaa 2024.Katika matembezi hayo yaliyoanzia Ofisi ya Mkuu wa Mkoa na kumalizika viwanja vya Nangwanda-Sijaona, Kanali Sawala amesisitiza wananchi wenye sifa kujitokeza kujiandikisha ili waweze kuchagua viongozi wa serikali za mitaa watakaowaongoza kwa miaka mitano ijayo.

Aidha Kanali Sawala amewataka wananchi wote wenye sifa za uongozi waweze kuchukua formu na kugombea nafasi mbalimbali huku akisisitiza kutunza amani wakati wote.“Ndugu zangu kuna maisha baada ya Uchaguzi; Sisi ndio tunaoishi Mtwara kwahiyo hapa ndio nyumbani kwetu, hivyo tusikubali mtu au kikundi cha watu kwa namna yoyote kituvurugie amani tuliyonayo.” Alieleza Kanali SawalaZoezi la Uandikishaji wapiga kura lilianza tarehe 11 Oktoba na litahitimishwa tarehe 20 Oktoba 2024.