Waziri Ummy aridhishwa na Ujenzi Hospitali Kanda ya kusini.

Posted on: December 24th, 2019

Waziri wa Afya Maendeleo ya Jamii Jinsia Wazee na Watoto Mhe. Ummy Mwalimu ameridhishwa na kasi ya ujenzi wa hospitali ya Rufaa ya Kanda ya Kusini inayojengwa katika eneo la Mitengo Manispaa ya Mtwara Mikindani.

Akizungumza na waandishi wa habari mara baada ya kutembelea hospitali hiyo amesema hiyo inaashiria uwezekano wa kufikiwa kwa lengo la serikali la kuhakikisha hospitali hiyo inaanza kazi Julai Mosi, 2020.

Amemtaka mkandarasi wa ujenzi huo ambaye ni Shirika la Nyumba la Taifa (NHC) kuhakikisha anafanya kazi usiku na mchana ili kufanikisha lengo.

Waziri Ummy ambaye alikuwa katika ziara ya siku moja mkoani hapa, pia ametembelea Hospitali ya Rufaa ya mkoa wa Mtwara, Ligula na kuridhishwa na upatikanaji wa dawa katika Hospitali hiyo huku akiagiza hospitali zote za wilaya na vituo vya afya kuanzisha mifuko ya dawa ili kuhakikisha upatikanaji wa dawa unakuwa endelevu.