Wilaya ya Masasi

Wilaya ya Masasi ina ukubwa wa kilometa za Mraba 442,819 sawa na asilimia 23 ya eneo lote la Mkoa wa Mtwara. Inazo Halmashauri mbili. Halmashauri ya Wilaya ya Masasi na Halmashauri ya Mji wa Masasi. Inayo Majimbo matatu ya Uchaguzi ambayo ni jimbo la Masasi, Jimbo la Lulindi na Jimbo la Ndanda.

Kwa mjibu wa sensa ya watu na Makazi ya mwaka 2012, Wilaya ina jumla ya wakazi 377,826 ambapo Halmashauri ya Mji ina wakazi 102,696 na Halmashauri ya Wilaya ina wakazi 275,130. Ongezeko la watu ni 2.7% kwa mwaka.

Wilaya ipo kati ya Longitudo 36⁰ na 38⁰ Mashariki mwa Greenwich na Latitude 10⁰ na 12⁰ Kusini mwa Ikweta . Wilaya inapakana na Wilaya ya Nachingwea kwa upande wa Kaskazini, Wilaya ya Lindi na Newala upande wa Mashariki, Wilaya ya Nanyumbu upande wa Magharibi na Mto Ruvuma upande wa Kusini.

Hali ya hewa ya Wilaya ni joto na baridi kiasi. Miezi ya joto ni Septemba hadi Mei na vipindi vya baridi ni Agosti. Mvua huanza kunyesha mwezi Desemba mpaka Aprili na masika Januari hadi Machi. Wilaya inapata mvua kiasi cha wastani wa mm 893 kwa mwaka na wastani wa joto ni nyuzi joto 25⁰C na kiasi cha juu ni nyuzi joto 32⁰C na kiasi cha chini ni nyuzi joto 22⁰C. pia Wilaya ipo kwenye mwinuko wa Mita 470 toka usawa wa bahari