DAWA YA DENI NI KULIPA; TAASISI ZA SERIKALI ZIWEKE MIPANGO YA KULIPA MADENI YA WAZABUNI” RAS GEUZYE

Posted on: June 27th, 2025

Katibu Tawala mkoa wa Mtwara, CPA. Bahati Geuzye amezitaka Taasisi za serikali zinazodaiwa na wazabuni mbalimbali kuweka mikakati ya kuhakikisha wanalipa madeni hayo. CPA. Geuzye ametoa rai hiyo leo tarehe 27 Juni 2025 wakati wa kikao kulichofanyika ukumbi wa Boma, kilichowakutanisha wazabuni na Taasisi za serikali zinazodaiwa.

“Dawa ya deni ni kulipa, tunafahamu tuna ufinyu wa rasilimali lakini ni busara kutenga bajeti kulipa kidogo kidogo ili wazabuni waendelee kutoa huduma bora. Tujiulize sisi tukiwa tunaenda kazini halafu hatulipwi, ingekuwaje?” Alihoji CPA. Geuzye

Mkuu wa kitengo cha manunuzi mkoa wa Mtwara, Bi Theresia Nsanzugwako ametoa wito kwa wazabuni wanaofanya kazi na Taasisi za serikali kuhakikisha wanafuata taratibu za ofisi ikiwemo kusaini mikataba na wakuu wa Taasisi ili hata ikitokea mtu hayupo ofisini nyaraka ziwepo na madeni yawe na sifa ya kulipika.