Miti milioni sita kupandwa Mtwara

Posted on: March 20th, 2018

Mkuu wa Mkoa wa Mtwara Mheshimiwa Gelasius Byakanwa akipanda mti wakati wa uzinduzi wa upandaji miti Kimkoa Mtwara

Mkoa wa Mtwara umeazimia kupanda miti milioni sita katika kipindi cha mwaka 2018. Miti hiyo itapandwa kupitia makundi mbalimbali ya kijamii ikiwemo Halmashauri  za  Wilaya,  watu  binafsi,  vikundi  na  Taasisi  mbalimbali  za  Kiserikali  na  zisizo  za  Kiserikali.  Aidha, aina  ya Miti  inayotarajiwa  kupandwa  ni  pamoja  na  miti ya  mbao,  mijengo,  kuni,  mapambo,  matunda na  miti  kilimo  hususan  mikorosho, michungwa na  miembe.

Hayo yamesemwa wiki hii na Katibu Tawala Msaidizi uchumi na uzalishaji mkoa wa Mtwara Amani Rusake wakati wa uzinduzi wa kampeini ya upandaji miti kimkoa uliofanyika katika kijiji cha Muungano kilichoko kata ya Lulindi wilayani Masassi Mkoani Mtwara.

Amesema tangu miaka ya nyuma mkoa umekwa ukihamasisha upandaji miti ambapo kwa kipindi cha miaka mitatu tangu 2015 mkoa umepanda miti 11,296,447. Mwaka  2015 mkoa ulipanda miti 3,250,442, Mwaka 2016 miti 3,353,273, Mwaka 2017 miti 4,692,732.

Ameitaja changanmoto ya ukataji miti hovyo kuwa ni moja ya sababu ya kupungua kwa misitu na kwamba mkoa umejipanga kupambana na hali hiyo.

Kwa upande wake Mkuu wa Mkoa wa Mtwara Mheshimiwa Gelasius Byakanwa amesema ukataji wa miti kiholela haukubaliki hivyo amewaagiza wakurugenzi wa Halmashauri kuhakikisha wanasimamia uzuiaji wa ukataji wa miti hovyo. Aidha ametoa wiki tatu kuhakikisha anapata taarifa ya orodha ya maeneo yaliyotengwa kwa ajili ya ukataji miti kwa ajili ya mkaa na vituo vya kukusanyia mkaa, orodha ya watengeneza mkaa, Ushahidi wa  miti  isiyopungua  1,000  au  zaidi  iliyopandwa  wakati  wa  msimu  wa  mvua  na  kila   mtengenezaji  wa  mkaa  aliyepata  leseni  kutoka  Wilayani.

Pia ameagiza sehemu ambapo hazipo Kamati  za  mazingira  za  vijiji   zinazohusika  pia  na  suala  la  upandaji  miti zianzishwe mara moja. Vilevile Kila  kijiji    kiwe  na  shamba  au  mashamba  maalum  ya  miti  kwa  ajili  ya  matumizi  ya  nishati  (kuni, mkaa)  na  biashara  ya  mbao.  

Sambamba na maagizo hayo Mheshimiwa Byakanwa ameagiza kila Mkuu wa Wilaya kuzindua kampeini hii wilayani kwake ili mkakati huu wa upandaji miti uwafikie na kueleweka kwa wananchi wote.