“MPENI USHIRIKIANO MKURUGENZI, MIRADI IKAMILIKE” RC MTWARA

Posted on: February 24th, 2025

Watumishi na wananchi wa Halmashauri ya wilaya ya Masasi wametakiwa kumpa ushirikiano Mkurugenzi wa sasa, Ndg. Alphaxard M. Etanga kama walivyokuwa wakimpa Mkurugenzi aliyekuwepo kabla, Bi. Beatrice Mwinuka ambae amehamishiwa Halmashauri ya wilaya ya Kilosa.

Rai hiyo imetolewa leo tarehe 24 Februari 2025 na Mkuu wa mkoa wa Mtwara Mhe. Kanali Patrick Sawala alipokuwa akikagua miradi ya shule za msingi (BOOST) na za sekondari (SEQUIP) katika Halmashauri hiyo.

“Mkurugenzi huyu nimemuona ni kiongozi anaependa matokeo chanya, tumtengenezee mazingira mazuri ya kufanya kazi kwani miradi yote inakayotekelezwa ni yetu wana Mtwara.” Alieleza Kanali Sawala

Kwa upande wake Ndg. Etanga alimueleza Mkuu wa Mkoa kuwa miradi yote iliyopokea fedha mwezi Juni 2024 itakamilika ifikapo Machi 30, 2025.

Miradi iliyotembelewa katika halmashauri hiyo ni Ujenzi wa Shule Mpya ya Sekondari Msikisi, Ujenzi wa Shule Mpya ya Sekondari ya Kata Mlingula na Ujenzi wa Shule Mpya ya Kata ya Mwena.