NI JUKUMU LETU VIONGOZI KUIELIMISHA JAMII UMUHIMU WA CHANJO - KANALI AHMED ABBAS AHMED_MKUU WA MKOA WA MTWARA.

Posted on: July 20th, 2023

Mkuu wa Mkoa wa Mtwara Kanali Ahmed Abbas Ahmed amewataka viongozi wa Mkoa wa Mtwara kuongeza ushawishi katika jamii hasa katika utoaji wa elimu kuhusu mapokeo ya chanjo pamoja na kuongeza uelewa wa jamii ili kuhakikisha mapambano dhidi ya magonjwa ya mlipuko yanayozuilika kwa chanjo yanazuiliwa.

Kanali Abbas ametoa kauli hiyo wakati wa akifungua kikao cha kamati ya Afya ya Msingi (PHC) katika ukumbi wa Boma na kusisitiza kuwa Serikali ya Mkoa inafanya jitihada kuhakikisha huduma za chanjo zinawafikia wale wote wenye sifa za kuipata, kama njia ya kukabiliana na magonjwa yanaweza kuzuilika.

Aidha Kanali Abbas amesisitiza kuwa vingozi wanapaswa kuhakikisha wanatumia Kila mbinu kuishawishi jamii kukubali kupata chanjo na kuongeza kuwa endapo itashirikishwa kikamilifu kwa kuwatumia viongozi wa siasa, dini, mila na watu maarufu itarahisisha kufikisha elimu na kuachana na fikra potofu dhidi ya chanjo.

Halikadhalika Kanali Abbas amesema kuwa Serikali ya awamu ya Sita chini ya Uongozi wa Mhe. Dkt Samia Suluhu Hassan, imeweka mpango wa kuwapatia chanjo ya saratani ya shingo  ya kizazi watoto wote wa kike kabla  hawajafikisha miaka 14  ili kuwalinda dhidi ya ugonjwa huo ambao kwa sasa ndio  unaongoza ukifuatiwa na ugonjwa wa Saratani ya matiti kwa wanawake.

Katika hatua nyingine kikao hicho kimetumika Kutambulisha Mradi wa Girl Effect unaokusudiwa kutoa elimu  ya afya ya uzazi sambamba na chanjo ya saratani ya shingo ya kizazi kwa wasichana wanye umri wa miaka 14 katika maeneo mbalimbali Mkoani Mtwara.